வேணாம்ணே பணம்...குட்புக்கில் வடிவேலு!

எந்திரன் படத்தின் பாடல் வெளியீட்டு விழா மலேசியாவில் நடந்ததல்லவா. விழாவில் கலந்து கொள்ள அப்படத்தில் நடித்த நட்சத்திரங்களை மட்டுமல்ல, எல்லா டெக்னீஷியன்களையும் அழைத்துச் சென்றிருந்தார்களாம். அது கூட பெரிய விஷயமில்லை. பேட்டா கொடுத்ததோடு வேலை முடிந்தது என்று கழற்றி விடாமல் படத்தில் பணியாற்றிய லைட் மேன்களை கூட ஃபிளைட்டில் ஏற்றிக் கொண்டு போயிருக்கிறார்கள். அந்த ஊரை சுற்றிக்காட்டியும் அழைத்து வந்திருக்கிறது சன் பிக்சர்ஸ்.

இதுவரைக்கும் எத்தனையோ படங்களுக்கு உழைச்சிருக்கோம். பாடல் வெளியீட்டு விழாவுக்கு இன்விடேஷன் கூட கொடுக்க மாட்டாங்க. ஆனா எங்களை மதிச்சதோடு நிறுத்திக் கொள்ளாமல் ஃபிளைட்லயே கூட்டிட்டு போனாங்க என்று பெருமைப்படுகிறது தொழிலாளர் வர்க்கம்.

இதற்கிடையில் எந்திரனில் நடித்திராத நட்சத்திரங்களையும் அங்கே அழைத்துச் சென்றிருந்தார்கள். அதில் பலருக்கு கவுரவமான தொகையும் வழங்கப்பட்டதாம். அப்படி எந்திரனுக்கு சம்பந்தமில்லாத வடிவேலுவும் சென்றிருந்தார் விழாவுக்கு. அவருக்கும் ஒரு பெரும் தொகையை வழங்கியதாம் சன் பிக்சர்ஸ். ஆனால் அதை நாகரீகமாக மறுத்த வடிவேலு, இந்த நிகழ்ச்சியிலே கலந்துக்கறதே பெருமைண்ணே. எனக்கு எதுக்குண்ணே பணம் என்று மறுத்தாராம். அவ்வளவுதான் கலாநிதி மாறனின் குட் புக்கில் தனி இடம் கிடைத்துவிட்டது வடிவேலுவுக்கு.

வடிவேலுவை பெருமைப்படுத்தும் விதத்தில் அங்குள்ள ஏழு நட்சத்திர அந்தஸ்துள்ள விடுதியில் ரூம் போட்டு கொடுத்தார்களாம். எத்தனை நாளு வேணும்னாலும் தங்குங்க. செலவு நம்முடையது என்று கூறியும் இரண்டே நாளில் சென்னைக்கு திரும்பிவிட்டார் வடிவேலு. ஆசையாதான் இருந்திச்சு. ஆனா வேலை கெடக்குதுண்ணே, அதான் என்கிறார்!