ஆக. 26 முதல் செப். 9 வரை குழந்தைகள் திரைப்பட விழா

நாகப்பட்டினம்,

நாகை மாவட்டத்தில் ஆக. 26-ம் தேதி முதல் செப். 9-ம் தேதி வரை
குழந்தைகள் திரைப்பட விழா நடைபெறும் என நாகை மாவட்ட ஆட்சியர் ச.
முனியநாதன் தெரிவித்துள்ளார். இந்திய குழந்தைகள் திரைப்படச்
சங்கம் சார்பில், நாகை மாவட்டத்தில் குழந்தைகள் திரைப்பட விழா நடத்துவது
குறித்த ஆலோசனைக் கூட்டம், நாகை மாவட்ட ஆட்சியரகத்தில் அண்மையில்
நடைபெற்றது. மாவட்ட ஆட்சியர் ச. முனியநாதன் தலைமை வகித்தார்.
மாவட்ட முதன்மைக் கல்வி அலுவலர் ஆர். வீராசாமி, செய்தி மக்கள் தொடர்பு
அலுவலர் சா. இளங்கோ, இந்திய குழந்தைகள் திரைப்பட சங்கப் பிரதிநிதி
ராதாகிருஷ்ணன், மாவட்டக் கல்வி அலுவலர்கள் ராமகிருஷ்ணன், கிரேஸ்
பிராங்க்ளின், மாவட்டத் தொடக்கக் கல்வி அலுவலர் ஆர். குணசேகர், உதவி
மக்கள் தொடர்பு அலுவலர் ச. விக்னேஷ் மற்றும் திரையரங்க மேலாளர்கள் கலந்து
கொண்டனர். இக்கூட்டத்தின் நிறைவில் ஆட்சியர் தெரிவித்தது :
இந்திய குழந்தைகள் திரைப்படச் சங்கத்தின் சார்பில், பள்ளி மாணவ,
மாணவிகளின் அறிவு வளர்ச்சியைத் தூண்டும் வகையில், நாகை மாவட்டத்தில் உள்ள
திரையரங்குகளில் ஆக. 26-ம் தேதி முதல் செப். 9-ம் தேதி வரை கருத்துப்
படங்கள் திரையிடப்படவுள்ளது. ஆறு பேர் ஆர்ப்பாட்டம், செல்லம்,
ஹயாத், துபாஷி, மயேக்மிர்ஷா, சுந்தரகாண்ட மகாபாரதம், வெற்றிப் பாதை ஆகிய 7
திரைப்படங்கள் திரையிடப்படும். மாவட்டத்தில் உள்ள 17 திரையரங்குகளில்
சுழற்சி முறையில் காலை 9 மணி முதல் 10.30 மணி வரை 65 காட்சிகள்
திரையிடப்படும். பள்ளிக் குழந்தைகள் சுமார் 50 ஆயிரம் பேர்
இந்தத் திரைப்படங்களை இலவசமாக கண்டுகளிக்கும் வகையிலான ஏற்பாடுகளுக்கு
அறிவுறுத்தப்பட்டுள்ளது என்றார் ஆட்சியர் ச. முனியநாதன்.