தமிழகம், புதுவையில் 2 நாட்களுக்கு இடியுடன் மழை

ரபீக் · ரபீக் Thu Jun 24, 2010 3:49 pm

வங்கக் கடலில் மழை மேகம் சூழ்ந்துள்ளதை அடுத்து தமிழகம் புதுச்சேரியில் 2 நாட்களுக்கு மழை பெய்யும் என்று சென்னை வானிலை ஆய்வு மையம் தெரிவித்துள்ளது.
தமிழகத்தில் ஒரு வாரமாக வெயில் கொளுத்தியது. இதனால் ஏற்பட்ட வெப்ப சலனத்தால், ஒரு சில இடங்களில் இடியுடன் மழை பெய்தது.
தமிழகத்தை பொறுத்தவரை சராசரியாக 100 டிகிரி வெயில் நிலவியதால் வளி மண்டலத்தில் வெப்ப சலனம் ஏற்பட்டு நேற்று முன்தினம் பரவலாக இடியுடன் மழை பெய்தது. தொண்டி, கன்னியாகுமரி, போளூர், சேந்தமங்கலம் ஆகிய இடங்களில் 30 மி.மீ மழை பெய்துள்ளது.

செஞ்சி, காரைக்கால், தஞ்சாவூர், வலங்கைமான், மானாமதுரை, சிவகங்கை, நத்தம், வேடசந்தூர் 20 மி.மீ, ஒரத்தநாடு, பாபநாசம், திருவிடைமருதூர், கொடைவாசல், மயிலாடு துறை, தக்கலை, வாணியம்பாடி, குமாரபாளையம், திருச்செங்கோடு, இளையான்குடி 10 மி.மீ மழை பெய்துள்ளது. இதை தொடர்ந்து சென்னையிலும் நேற்று முன்தினம் மாலை ஒரு சில இடங்களில் இடியுடன் மழை பெய்தது.

சென்னையில் நேற்று பகலில் 100 டிகிரி வெயில் கொளுத்தியது. அனல்காற்று வீசியது. ஆனால் மாலையில் சென்னை மற்றும் புறநகர் பகுதியில் ஒரு சில இடங்களில் சூறைக்காற்றுடன் மழை பெய்தது. அப்போது ஒரு சில இடங்களில் மரங்கள் சாய்ந்தன. வீட்டின் கூரையும் காற்றில் அடித்துச் செல்லப்பட்டது.

நேற்று மதியம் வங்கக் கடலில் மழை மேகம் சூழ்ந்தது. இதன் காரணமாக ஆந்திராவில் நல்ல மழை பெய்து வருகிறது. இதன் தொடர்ச்சியாக தமிழக மற்றும் புதுச்சேரி கடலோரப் பகுதியில் மழை பெய்யும் வாய்ப்புள்ளது.

மேலும் வளி மண்டலத்தில் ஏற்பட்டுள்ள வெப்ப சலனம் காரணமாக மாலை, காலை நேரங்களில் இடியுடன் மழை பெய்யும்.