பண்ணாரி மாரியம்மன்

**சிவா** · **சிவா** Thu 25 Jun 2009 - 17:49

அருள்மிகு பண்ணாரி மாரியம்மன் ஆலயம் பெரியார் மாவட்டம் சத்திய மங்கலத்திலிருந்து மைசூர் செல்லும் வழியில் 12 கி.மீ. தூரத்தில் கொடிய வனவிலங்குகளும், விஷ ஜந்துக்களும் நிறைந்த காட்டுப்பகுதியில் அமைந்துள்ளது. காட்டில் கோலோச்சிக் கொண்டு தம்மை தரிசிக்கவரும் பக்தகோடிகளுக்கு எப்போதும் அருள்மாரி பொழிந்து கொண்டு இருப்பவளே பண்ணாரி மாரியம்மன்.

இக்கோயிலுக்கு புராண வரலாறு என்ற ஒன்று இல்லை எனினும், இவ்வாலயம் 800 ஆண்டுகள் பழமை வாய்ந்தது.

இறைவன் குடிகொண்டுள்ள கோயில்களின் வரலாறுகளை ஆராய்ந்தால் ஓர் உண்மை புலப்படும். அப்பகுதிகளில் மேய்ந்து வந்த பசுக்களில் ஒன்றுதான் இறை வன் இருப்பிடத்தை ஆராய்ந்து மடியி லிருந்து பால் பொழி யும். பசுக்களுக்கு தெய்வம் குடி கொண்டுள்ள இடத்தை அறியும் உள்ளுணர்வு உண்டு எனக் கூறப்படுகிறது. இக்கூற்றுக்கு ஏற்ப பண்ணாரி ஆலயப்பகுதியிலும் கோயில் கட்டப்படும் முன்பு ஒரு பசு முட்புதர், செடி, கொடிகளுக்கு இடையே இருந்த கல் ஒன்றின் தெய்வீக ஒளியையும் சக்தியையும் கண்டறிந்து அதன் மேல் தனது மடியிலிருந்து பால் சொரிந்து வந்தது. இதை அறிந்த அக்கம் பக்கத்து மக்கள் அப்பகுதிக்கு விரைந்தனர். ஆன்மீக அன்பர் ஒருவர் அன்னை மாரியம்மன் அக்கல் வடிவில் நமக்கு அருள் செய்வதற்காக அவதாரம் செய்துள்ளாள் என ஆவேசம் வந்து கூறினார். இதனையடுத்து அவ்விடத்திலேயே செடி, கொடி புதர்களை அகற்றி அன்னை மாரி யம்மனுக்கு ஒரு கீற்றுக் கொட்டகையில் ஆலயம் கட்டப்பட்டது.

பிற்காலத்தில் கீற்றுக் கொட்டகை அகற்றப்பட்டு கல், சுண்ணாம்பு, செங்கல் ஆகியவற்றைக் கொண்டு அன்னைக்கு ஆலயம் கட்டப்பட்டது. அன்னையின் சக்தி எல்லையற்றது என பக்தர்கள் நம்புகின்றனர்

பண்ணாரி அம்மன் கோவிலில் ஆண்டு தோறும் மிகவும் சீரும் சிறப்புடன் அக்னி குண்ட திருவிழா நடக்கும். இந்த அக்னி குண்டத்தில் இறங்கி ஏறுவதை மக்கள் வழக்கமாக கொண்டுள்ளனர். இந்த அக்னி குண்டத்திற்காக காட்டிலிருந்து மரங்களை வெட்டி கொண்டு வருவதை இன்றும் வழக்கமாக கொண்டுள்ளனர். இந்த பார் போற்றும் பண்ணாரி அம்மன் அக்னி குண்ட திருவிழா ஆண்டு தோறும் பங்குனி மாதத்தில் நடைபெறும்.