உலக கோப்பை ஆக்கி: தொடக்க ஆட்டத்தில் இந்தியா அபார வெற்றி! பாகிஸ்தானை வீழ்த்தியது

உலக கோப்பை ஆக்கி தொடக்க ஆட்டத்தில் இந்திய அணி, தனது பரம போட்டியாளரான பாகிஸ்தானை 4-1 என்ற கோல் கணக்கில் வீழ்த்தியது.

உலக கோப்பை ஆக்கி

ஹீரோஹோண்டா 12-வது உலக கோப்பை ஆண்கள் ஆக்கி போட்டி டெல்லியில் உள்ள மேஜர் தயான்சந்த் ஸ்டேடியத்தில் நேற்று தொடங்கியது. 12 முன்னணி அணிகள் பங்கேற்றுள்ள இந்த போட்டி வருகிற 13-ந்தேதி வரை நடக்கிறது. அணிகள் இரு பிரிவாக பிரிக்கப்பட்டு உள்ளன. `ஏ' பிரிவில் நடப்பு சாம்பியன் ஜெர்மனி, ஆலந்து, கொரியா, நிïசிலாந்து, கனடா, அர்ஜென்டினா ஆகிய அணிகளும், `பி' பிரிவில் ஆஸ்திரேலியா, ஸ்பெயின், இங்கிலாந்து, பாகிஸ்தான், இந்தியா, தென்ஆப்பிரிக்கா ஆகிய அணிகளும் இடம் பெற்றுள்ளன.

ஒவ்வொரு அணியும் தங்கள் பிரிவில் உள்ள மற்ற அணியுடன் தலா ஒரு முறை மோத வேண்டும். லீக் முடிவில் ஒவ்வொரு பிரிவிலும் முதல் 2 இடங்களை பிடிக்கும் அணிகள் அரைஇறுதிக்கு தகுதி பெறும்.

வரலாறு காணாத பாதுகாப்பு

இந்த போட்டியில் பங்கேற்கும் வெளிநாட்டு வீரர்களுக்கு தீவிரவாதிகள் மிரட்டல் விடுத்திருந்ததால், வரலாறு காணாத பாதுகாப்பு ஏற்பாடுகள் செய்யப்பட்டு உள்ளன. ரசிகர்கள் கடும் சோதனைக்கு பிறகே அனுமதிக்கப்பட்டனர். மைதானத்திற்குள் ரூபாய் நாணயங்கள் கொண்டு செல்ல கூட போட்டி அமைப்பாளர்கள் அனுமதிக்கவில்லை.

நாணயத்தை கொண்டு வீரர்கள் மீது எறிந்து விட வாய்ப்பு இருப்பதால், முன்எச்சரிக்கை நடவடிக்கையாக நாணயங்களை மைதானத்திற்குள் கொண்டு செல்ல தடை விதிக்கப்பட்டிருப்பதாக பாதுகாப்பு அதிகாரி ஒருவர் தெரிவித்தார். போலீசார், அதிரடி படையினர், துணை ராணுவ படையினர் என்று சுமார் 19 ஆயிரம் பேர் பாதுகாப்பு பணியில் ஈடுபடுத்தப்பட்டு உள்ளனர். இவ்வாறு உச்சக்கட்ட பாதுகாப்புக்கு மத்தியில் உலக கோப்பை ஆக்கி திருவிழா தொடங்கியது.

இந்தியா ஆதிக்கம்

முதல் நாளான நேற்று பி பிரிவில் 3 ஆட்டங்கள் நடந்தன. இதில் எல்லோரும் ஆவலோடு எதிர்பார்த்த இந்தியா-பாகிஸ்தான் இடையிலான ஆட்டம் இரவு 8.35 மணிக்கு தொடங்கியது. ஆரம்பம் முதலே ஆட்டம் விறுவிறுப்பாக நகர்ந்தது. உள்ளூர் ரசிகர்களின் ஏகோபித்த ஆதரவுடன் களம் இறங்கிய இந்திய வீரர்கள் தொடக்கத்தில் இருந்தே ஆதிக்கம் செலுத்தினர். பந்தை கடத்தி செல்வது, தட்டிப்பறிப்பது ஆகியவற்றில் பாகிஸ்தானை விட சிறப்பாக செயல்பட்ட இந்திய வீரர்கள் அடிக்கடி பாகிஸ்தான் கோல்வளையை முற்றுகையிட்டபடி இருந்தனர். பெரும்பாலான நேரங்களில் பந்து இந்தியாவின் கட்டுப்பாட்டில் இருந்தது.



27-வது நிமிடத்தில் பெனால்டி கார்னர் வாய்ப்பை பயன்படுத்தி இந்திய வீரர் ஷிவேந்திர சிங் முதலாவது கோலினை அடித்தார். தொடர்ந்து முதல் பாதி நேரம் முடிய இருந்த நேரத்தில் இந்திய நட்சத்திர வீரர் சந்தீப்சிங் கோல் போட்டார். இதனால் முதல் பாதியில் இந்தியா 2-0 என்ற கணக்கில் முன்னிலை பெற்றது.

வீழ்ந்தது பாகிஸ்தான்

அடுத்து 2-வது பாதி தொடங்கிய சிறிது நேரத்தில் பிரப்ஜோத்சிங் (37-வது நிமிடம்) கோல் போட்டு இந்திய ரசிகர்களை மேலும் மகிழ்ச்சியில் ஆழ்த்தினார். அதே சமயம் பாகிஸ்தான் வீரர்கள் பதில் கோல் திருப்ப போராடினார்கள். 48, 52, 54-வது நிமிடங்களில் கிடைத்த பெனால்டி வாய்ப்புகள் அனைத்தையும் பாகிஸ்தான் வீரர்கள் வீணாக்கினார்கள்.

இதன் பின்னர் 57-வது நிமிடத்தில் இந்தியா 4-வது கோலை திணித்தது. சந்தீப்சிங்கே இந்த கோலையும் அடித்தார். இந்தியா பலமான முன்னிலை பெற்றதும், பாகிஸ்தான் வீரர்கள் மனதளவில் நிலைகுலைந்து போயினர். தொடர்ந்து 59-வது நிமிடத்தில் பாகிஸ்தானின் சோகைல் அப்பாஸ் ஆறுதல் அளிக்கும் வகையில் ஒரு கோல் திருப்பினார்.

முடிவில் இந்திய அணி 4-1 என்ற கணக்கில் அபார வெற்றி பெற்றது. இதன் மூலம் கடந்த ஆண்டு டிசம்பர் மாதம் அர்ஜென்டினாவில் நடந்த சாம்பியன்ஸ் சேலஞ்ச் போட்டியில் அடைந்த தோல்விக்கும் இந்தியா பழிதீர்த்துக் கொண்டது. வெற்றிக்கணக்குடன் உலக கோப்பை போட்டியை தொடங்கி இருப்பதால் இந்தியாவின் நம்பிக்கை அதிகரித்து இருக்கிறது. இந்திய அணி தனது 2-வது ஆட்டத்தில் நாளை (செவ்வாய்க்கிழமை) வலுவான ஆஸ்திரேலியாவை (இரவு 8.35 மணி) எதிர்கொள்கிறது.

ஆஸ்திரேலியா தோல்வி

முன்னதாக நடந்த மற்றொரு ஆட்டத்தில் உலகத்தரவரிசையில் 2-வது இடம் வகிக்கும் அணியான ஆஸ்திரேலியா, இங்கிலாந்திடம் 2-3 என்ற கோல் கணக்கில் அதிர்ச்சி தோல்வி அடைந்தது. தொடக்கத்தில் ஆஸ்திரேலியா ஆதிக்கம் செலுத்திய போதும், அந்த அணிக்கு அதிர்ஷ்டம் இல்லை என்று தான் சொல்ல வேண்டும். 12 பெனால்டி கார்னர் வாய்ப்பில் ஒன்றை கூட கோலாக்கவில்லை. இங்கிலாந்து தரப்பில் ஆஷ்லெ ஜேக்சன் ஒரு கோலும், ஜேம்ஸ் திண்டால் 2 கோலும் அடித்தனர். ஆஸ்திரேலிய அணிக்கு கேப்டன் ஜேமி வியர் 2 கோலையும் அடித்திருந்தார்.

இன்னொரு ஆட்டத்தில் பலம் வாய்ந்த ஸ்பெயின் அணி 4-2 என்ற கோல் கணக்கில் தென்ஆப்பிரிக்காவை சாய்த்தது. முதல் பாதியில் இரு அணியும் தலா 2 கோல் அடித்திருந்த நிலையில், பிற்பாதியில் ராட்ரிகோ கார்ஸா, கிïமாடா ஆகியோர் அடித்த கோல்கள் ஸ்பெயினின் வெற்றியை உறுதி செய்தன.

இன்றைய ஆட்டங்கள்

இன்று (திங்கட்கிழமை) ஏ பிரிவில் 3 லீக் ஆட்டங்கள் நடக்கின்றன. இதில் நிïசிலாந்து-கனடா (மாலை 4.35 மணி), ஜெர்மனி-கொரியா (மாலை 6.30 மணி), ஆலந்து-அர்ஜென்டினா (இரவு 8.35 மணி) ஆகிய அணிகள் மோதுகின்றன. டென் ஸ்போர்ட்ஸ் சேனலில் நேரடி ஒளிபரப்பு செய்யப்படுகிறது.