``ஈராக், லிபியா மீது அமெரிக்கா குண்டுவீசியதை பென்டகன் மறந்துவிட்டது போல"- ரஷ்ய தூதர் தாக்கு

-
`ஈராக், லிபியா மீது அமெரிக்கா மற்றும் நேட்டோ எப்படி
குண்டுவீசின என்பதை பென்டகன் மறந்துவிட்டது' என
அமெரிக்காவுக்கான ரஷ்ய தூதர் அறிக்கை வெளியிட்டுள்ளார்.

அமெரிக்கா, ஐரோப்பிய நாடுகள் உட்பட 30 நாடுகள் ஒன்றிணைந்துள்ள
கூட்டமைப்பான நேட்டோவில் உக்ரைன் இணையக்கூடாது என்றுகூறி
உக்ரைன் மீது ரஷ்யா போர்த் தாக்குதல் நடத்திவருகிறது.

ரஷ்ய அதிபர் புதினின் உத்தரவின்பேரில் கடந்த 24-ம் தேதி ரஷ்யப்
படையினரால் உக்ரைனில் தொடங்கப்பட்ட இந்த போர் 4 வாரங்களாக
நடைபெற்றுவருகிறது. உலக நாடுகள் பலவும் இதற்கு எதிர்ப்பு தெரிவித்து,
ரஷ்யா மீது பல்வேறு பொருளாதாரத் தடைகளை விதித்தபோதும் ரஷ்யா
போரை நிறுத்தியபாடில்லை.

மேலும், சர்வதேச நீதிமன்றமும் கூட, உக்ரைனில் போரை உடனடியாக
நிறுத்துமாறு ரஷ்யாவுக்கு உத்தரவிட்டும், ரஷ்யா அதை மறுத்துவருகிறது.

இதற்கிடையில், `உக்ரைனில் நடந்த போர்க்குற்றங்களில் ரஷ்ய ஆயுதப்
படைகள் ஈடுபட்டன' என அமெரிக்கப் பாதுகாப்புத்துறையின்
தலைமையகமான பென்டகனின் செய்தித் தொடர்பாளர் ஜான் கிர்பி
ரஷ்யா மீது குற்றம்சாட்டியிருந்தார்.

இந்த நிலையில், பென்டகனின் இந்த குற்றச்சாட்டுக்குப் பதிலளிக்கும்
விதமாக, அமெரிக்காவுக்கான ரஷ்ய தூதர் அனடோலி அன்டோனோவ்
டெலிகிராம் சேனலில் அறிக்கை வெளியிட்டுள்ளார்.

அந்த அறிக்கையில், ``யுகோஸ்லாவியா, ஈராக் மற்றும் லிபியா ஆகிய
நகரங்களின் மீது அமெரிக்கா மற்றும் அவர்களின் நேட்டோ நட்பு
நாடுகளின் விமானங்கள் சமீபத்தில் எப்படி குண்டுவீசின என்பதை
பென்டகன் ஏற்கெனவே மறந்துவிட்டது.

மேலும், ஆஃப்கானிஸ்தான் மற்றும் சிரியாவில் அமெரிக்க ராணுவ வீரர்கள்
மற்றும் கூலிப்படையினர் செய்த கொடூரமான குற்றங்கள், வாஷிங்டனுக்கு
நினைவில் இல்லை" என அனடோலி அன்டோனோவ் கூறியுள்ளார்.

இதுமட்டுமல்லாமல், ``ரஷ்ய ஆயுதப் படைகளின் தாக்குதல்கள் உக்ரேனிய
இராணுவ உட்கட்டமைப்பு வசதிகளை மட்டுமே குறிவைக்கின்றன" என்றும்
அனடோலி அன்டோனோவ் அந்த அறிக்கையில் குறிப்பிட்டிருந்தார்.

-விகடன்

அதானே...அமெரிக்கா பண்ணினால் எல்லாம் கரெக்ட் .... .. மத்தவங்க பண்ணினால் இவங்க கேள்வி கேட்பாங்க.... இப்ப பாருங்கள் போர் வேண்டாம் வேண்டாம் என்று சொல்லிக் கொண்டே அமெரிக்கர்கள் தங்களின் போர்தளவாடங்களை விற்றுக் கொண்டிருக்கிறர்கள்.... ...அவங்களுக்கு செக் வைக்க உலகத்தில் யாரும் இல்லையே.....