அனாதைப் பொங்கல்

ஆசியாவின் கண்டத்திலே
அனல் காயும் தேசங்களில் - தமிழ்
உழவன் வாழும் ஊர்களிலே
சேவல் கூவித் துயில் எழுப்ப
கொடியரும்பு கண்சிமிட்ட
கதிரவனைத் துயில் எழுப்ப
வாண வெடிகள் கொழுத்திப்போட்டு
பனிக் குளிரில் நாமெழுந்து
உடல் நடுங்க குளியலிட்டு
புத்தாடை தனை உடுத்தி
மாட்டுச் சாணம் எடுத்துவந்து - அம்மா
முற்றத்தினை மெழுகி வைக்க
முற்றத்து மா நிழலில் - அப்பா
மாவினாலே கோலமிட்டு
புதுப்பானை தனையெடுத்து
புதிதாய் செய்த மண் அடுப்பில்
கதிரவன் வரும் திசை பார்த்து
பானைதனை எடுத்து வைத்து
புத்தரிசி அதில் போட்டு
பாலோடு சர்க்கரையும்
புதுப்பானை தனிலிட்டு
கதிரவன் உதிக்கும் நேரம்
பால் பொங்கி வரும்போது
ஆனந்த மகிழ்ச்சி பொங்க
பட்டாசுகள் கொழுத்திடுவோம்
எல்லோரும் கூடியிருந்து
வாழையிலை தனையெடுத்து
புதுப் பொங்கல் அதில்போட்டு
குழைத்துவைத்த பஞ்சாமிர்தமும்
வாழைப் பழமும் தானெடுத்து
பொங்கலோடு சேர்த்து நாங்கள்
அமிர்தமாக நாம் உண்போம்.

இன்று

குளிர் காயும் தேசத்திலே
பொங்கல் நாளும் தெரியாமல்
நாளை தைப்பொங்கலாம் என்று
யாரோ ஒருவர் ஞாபகப்படுத்த
சரி ஏதோ கடமைக்காக
நாங்களும் பொங்குவோம் என்று
அவசரமாய்ப் புறப்பட்டு
ஆசியக் காரரின் கடைதேடி
பொங்கல் சாமான் வாங்கி வந்து
புதுப்பானை இல்லை - இரும்புச்
சட்டியொன்று நாம் எடுத்து
அடுக்களைக்குள் அதை வைத்து
மின்னடுப்பைத் திருகிவிட்டு
புத்தரிசி என்று சொல்லி
பச்சரிசி அதிலிட்டு
சர்க்கரையும் பாலோடு
-கஜு- பருப்பும் கூடப்போட்டு
மோதகம் போலே ஒன்றும்
வடையும் சமைத்து நாங்கள்
தொலைக்காட்சி பார்த்துக்கொண்டு
அனாதைப் பொங்கலொன்று
கடமைக்காக நாம் உண்டோம்
அண்மையிலே வந்துபோன
நத்தார்விழாவும் வருஷமும்போல
தைப்பொங்கல் இல்லையே என
பதில்சொல்ல முடியாத
கேள்வி யொன்று பிள்ளை கேட்க
இல்லை இதுதான் பொங்கலென்றும்
தமிழர்களின் பெருவிழா என்றும்
பெருமையாக சொல்லிவிட்டு
அனாதைப் பொங்கலொன்று
கடமைக்காக நாமுண்டோம்.
தாய் மண்ணில் மீண்டும் சென்று
புதுப்பானை நாமெடுத்து
புதுப்பொங்கல் நாங்கள் பொங்கி
ஊருறவும் கூடியிருந்து
பகிர்ந்து நாங்கள் அமிர்தமுண்ண
காத்திருக்கும் பொங்கலை எண்ணி
அனாதைப் பொங்கலொன்று - மின்
அடுப்பில் பொங்கி நாமுண்டோம்.

பொன். சிவா

UDAYASUDHA wrote:மிகவும் உண்மை சிவா. வெளிநாட்டில் வசிப்பவர் என்றால் "ஆ" என்று வாயை பிளக்கிற‌ மற்றவர்களுக்கு நாங்கள் இது போல சந்தோசங்களையெல்லாம் இழந்துக் கொண்டிருக்கிறோம் என்பது புரியாது.

இந்த வெளிநாட்டில் பொங்கள் திருவிழா மட்டும் இழக்கவில்லை வாழ்க்கையின் பாதி காலங்கள் இழந்துவிடுகிறோம்