எழுதுவதை நிறுத்துகிறேன்… சாகித்ய அகாடெமி விருது வாங்கிய இளம் எழுத்தாளர் அறிவிப்பு!

சாகித்ய அகாடெமியின் யுவ புரஸ்கார் விருது
பெற்ற எழுத்தாளர் லஷ்மி சரவணக்குமார்
இனிமேல் தான் எழுதப் போவதில்லை என்ற
அறிவிப்பை சமூகவலைதளம் வாயிலாக
எழுதியுள்ளார்.

இந்தியாவை பொறுத்தவரை எழுத்தாளர்களுக்கு
பொருளாதார ரீதியான அங்கிகாரம் கிடைப்பதில்லை.
இதனால் பல எழுத்தாளர்களும் பகுதி நேரமாக
மட்டுமே எழுதிக் கொண்டு வாழ்வாதாரத்துக்கு
வேறு ஏதாவது வேலைகளை செய்து
கொண்டிருப்பார்கள்.

அப்படி எழுத்தாளராக அறியப்பட்டாலும் தனது
வாழ்வின் தேவைகளுக்காக சினிமாவில்
திரைக்கதை எழுத்தாளராகவும், உதவி
இயக்குனராகவும் பணியாற்றி வந்தவர்
லஷ்மி சரவணக்குமார். இவர் உப்பு நாய்கள்,
கானகன் மற்றும் கொமோரொ உள்ளிட்ட
நாவல்களையும் சிறுகதை தொகுப்புகளையும்
எழுதி வெளியிட்டுள்ளார்.

இவருக்கு சாகித்திய அகாடெமியின் யுவபுரஸ்கார்
விருதும் வழங்கப்பட்டுள்ளது.

இந்நிலையில் தான் இனிமேல் எழுதப்போவதில்லை
என்று அவர் தனது சமூகவலைதளப் பக்கத்தில்
அறிவித்துள்ளார். அதில் ‘2005 ம் ஆண்டு எழுதத்
துவங்கினேன், பதினைந்து ஆண்டுகள் கடந்துவிட்டன.
நல்ல வேலையில் இருந்தபடி பகுதிநேரமாக எழுதும்
ஆள் அல்ல.

உருப்படியோ இல்லையோ முழுமையாக எழுத்தை
மட்டுமே நம்பி பயணித்தேன். கசப்பும் வறுமையும்
ஏமாற்றமும் மட்டுமே மிச்சம்.

வாழைப்பழம் மாதிரி பேசும் ஆட்கள் கூட
ஆஸ்பத்திரியில் சாகக் கிடைக்கையில் பத்து பைசா
கொடுக்க தயாரில்லை என்பதுதான் நிஜம்.

புத்தகம் விற்கவில்லை என்பதால் ராயல்டி இல்லை
என்கிறார்கள். உண்மைதான் புத்தகம் விற்பதில்லை.

யோசித்தால் யாருக்கும் பயனில்லாமல் வறுமையோடு
இதை ஏன் தொடர்ந்து செய்ய வேண்டும்? அதனால்
மகிழ்வோடு எழுத்தை நிறுத்துகிறேன்.

என் தனிப்பட்ட வாழ்வில் அன்றாட தேவைகளுக்கு வழி
செய்துவிட்டபின் மெதுவாக எழுத வருகிறேன். நான்
எழுதாமல் போனாலும் ஒன்றும் குடிமுழுகிப் போகாது.
எல்லோருக்கும் நன்றி.’ என அறிவித்துள்ளார்
-
வெப்துனியா

‘உருப்படியோ இல்லையோ முழுமையாக எழுத்தை
மட்டுமே நம்பி பயணித்தேன். கசப்பும் வறுமையும்
ஏமாற்றமும் மட்டுமே மிச்சம்.’-

உண்மைதான்!
அரசாங்கம் நூற்களை விலைக்கு வாங்கி எழுத்தாளர்களை ஆதரிக்கலாம் என்றால், நூற்களை வாங்குவதிலும் ‘கமிஷன்’ அல்லவா தலைவிரித்தாடுகிறது!