மின்சாரத்தால் இயங்கக் கூடிய கண்ணாடி !

--


சாதாரண முகம் பார்க்கும் கண்ணாடியில் பார்த்தால் முகம்
தெரியும். இந்த மின்சார கண்ணாடியில் பார்த்தாலும் முகம்
தெரியும். கூடுதலாக முகத்தைப் பற்றிய தகவல்களை அது
உங்களுக்குச் சொல்லிவிடும்.

இந்த கண்ணாடி மின்சாரத்தால் இயங்கக் கூடியது.
இதை வீட்டின் சுவரில் பொருத்தி மின் இணைப்புக் கொடுத்து
விட்டு இயக்கினால், உங்களுடைய முகத்தைப்
புகைப்படமெடுத்துவிடும். அந்தப் புகைப்படங்களிலிருந்து
முகத்தில் உள்ள கரும்புள்ளிகள், தேமல், பரு, கொப்புளம்,
வறண்டு இருப்பது என எல்லாவற்றைப் பற்றிய தகவல்களை
அது உங்களுக்குத் தெரிவித்துவிடும்.

உங்கள் முகம் வறண்டிருக்கிறது என்றால், அதைச் சரி செய்ய,
"நீங்கள் ஸ்ட்ராபெர்ரி, தக்காளி, ஆரஞ்ச், வாழைப்பழம்
ஆகியவற்றைச் சாப்பிட வேண்டும். இந்த பழங்களில் உள்ள
சத்துகளான வைட்டமின் சி, பி2, பி6 ஆகியவை முகத்தின்
தோல் சேதமடையாமல் பாதுகாக்கும்.
வீக்கத்தைக் குறைக்கும். முகத்தை ஒளி பொருந்தியதாக
ஆக்கும்' என்பன போன்ற தகவல்களை அளிக்கும்.

ஒருமுறை உங்கள் முகத்தை புகைப்படங்கள் எடுத்து அதன்
மூலம் கிடைத்த தகவல்களை இந்த கண்ணாடி பதிவு செய்து
கொள்ளும். அடுத்த முறை உங்கள் முகத்தைப் புகைப்படங்கள்
எடுக்கும்போது ஏற்கெனவே எடுத்த புகைப்படங்களின் மூலம்
கிடைத்த தகவல்களையும் புதிய புகைப்படங்களில் இருந்து
கிடைத்த தகவல்களையும் சரி பார்த்து, உங்களுடைய முகத்தின்
வறட்சித்தன்மை கடந்த முறையை விட எவ்வளவு சதவீதம்
குறைந்திருக்கிறது... அல்லது கூடியிருக்கிறது என்று கூறும்.
இல்லையென்றால் தோல் நோய் மருத்துவரைப் பார்க்க
பரிந்துரைக்கும்.

இந்த கண்ணாடியில் ஒருவர் முகத்தை மட்டும் அல்ல,
யாரெல்லாம் இந்தக் கண்ணாடியில் தங்களுடைய கணக்கை
தொடங்கியிருக்கிறார்களோ... அவர்களுடைய முகங்களைப்
பற்றிய இவை போன்ற தகவல்களை இந்த கண்ணாடி அளிக்கும்.
இதன் விலை சுமார் ரூ.41,000.
--------------------------
என்.ஜே., சென்னை-58.
தினமணி கதிர்