வங்கி முறைகேடு: குஜராத் நிறுவனத்தின் ரூ.34 கோடி சொத்துகள் முடக்கம்

புது தில்லி:
வங்கி முறைகேடு நிகழ்ந்ததாகக் கூறப்படும் வழக்கில் குஜராத்
மாநிலத்தைச் சோ்ந்த நிறுவனத்தின் ரூ.34 கோடி மதிப்பிலான
சொத்துகளை நிதி மோசடி தடுப்புச் சட்டத்தின் கீழ் அமலாக்கத்
துறை முடக்கியுள்ளது.

இதுதொடா்பாக அமலாக்கத் துறை சனிக்கிழமை வெளியிட்ட
அறிக்கையில் கூறப்பட்டுள்ளதாவது:

வங்கி முறைகேடு தொடா்பாக பயோடாா் இன்டஸ்ட்ரீஸ் லிமிடெட் நிறுவனம்,
அதன் நிா்வாக இயக்குநா் ராஜேஷ் எம். கபாடியா மற்றும் சிலருக்கு எதிராக
விசாரணை நடத்தப்பட்டு வருகிறது. கடந்த 2007-09 காலகட்டத்தில் போலியான
ரசீதுகளை தயாரித்ததன் மூலம் ரூ.250 கோடி வரை அவா்கள் முறைகேடாக
ஈட்டியது விசாரணையில் தெரியவந்தது.

இந்த விவகாரத்தில் கபாடியா உள்ளிட்டோா் முறைகேடாக ஈட்டிய பணத்தை
பரிவா்த்தனை செய்வதற்கு கேஜிஎன் குழும நிறுவனத்தின் உரிமையாளா்
ஆரிஃப் இஸ்மாயில்பாய் மேமன் உடந்தையாக இருந்ததும் தெரியவந்தது.
அந்த வகையில் ரூ.62 கோடியை தனது கேஜிஎன் குழு நிறுவனத்தின் வங்கிக்
கணக்குகளுக்கு மேமன் மாற்றியுள்ளாா்.

இந்த வழக்கில் தற்போது கேஜிஎன் நிறுவனம் மற்றும் கேதா மாவட்டத்திலுள்ள
சாய்லானி அக்ரோடெக் நிறுவனம் ஆகியவற்றுக்குச் சொந்தமான நிலம்,
உற்பத்தி தொழிற்சாலை, இயந்திரங்கள் ஆகியவற்றை நிதி மோசடி தடுப்புச்
சட்டத்தின் கீழ் (பிஎம்எல்ஏ) முடக்கி நடவடிக்கை மேற்கொள்ளப்பட்டுள்ளது.
அதேபோல், ஆமதாபாதில் உள்ள மேமனின் குடியிருப்பும் முடக்கப்பட்டுள்ளது.

தற்போது முடக்கம் செய்யப்பட்டுள்ள சொத்துகளின் மொத்த மதிப்பு
ரூ.34.47 கோடியாகும் என்று அந்த அறிக்கையில் அமலாக்கத் துறை கூறியுள்ளது.

ஏற்கெனவே, இந்த வழக்கில் தொடா்புடையவா்களுக்குச் சொந்தமான
ரூ.149 கோடி சொத்துகளை அமலாக்கத் துறை முடக்கியுள்ள நிலையில்,
வழக்கு விசாரணையில் குற்றப்பத்திரிகையும் தாக்கல் செய்யப்பட்டுள்ளது.

இந்த முறைகேடு வழக்கு தொடா்பாக சிபிஐ மற்றும் குஜராத் காவல்துறை
ஆகியவையும் தனியே விசாரித்து வருகின்றன.

தினமணி