அமேசானுக்கு போட்டியாக களமிறங்கும் பிளிப்கார்ட்: உணவு சந்தையிலும் கால் பதிக்கிறது

புதுடெல்லி
அமேசானுக்கு போட்டியாக பெரிய அளவில் இந்திய உணவுச் சந்தையில் களமிறங்க பிளிப் கார்ட் நிறுவனம் தயாராகி வருகிறது.

ஆன்லைன் வர்த்தக நிறுவனமான அமேசான் இந்திய சந்தையில் தனது வர்த்தகத்தை அதிகரித்து வருகிறது.

தீபாவளி பண்டிகையை முன்னிட்டு அமேசான் தனது விற்பனையை அதிகரிக்க பல்வேறு நடவடிக்கைகளை எடுத்து வருகிறது. தீபாவளி பண்டிகையின் போது 10 கோடி புதிய வாடிக்கையாளர்களை ஈர்க்க திட்டமிட்டுள்ளது.

இதற்காக வழக்கமான மொபைல்போன், எலெட்ரானிக்ஸ் பொருட்கள் மட்டுமின்றி பலசரக்கு, காய்கறிகள் என உணவு சந்தையிலும் கவனம் செலுத்தி வருகிறது.

இந்தியாவில் 100 சதவீதம் உணவு சந்தையில் வெளிநாட்டு முதலீட்டுக்கு மத்திய அரசு அனுமதியளித்துள்ளது. கடந்த 2017-ம் ஆண்டே இதற்கான அனுமதியையும் பெற்று வர்த்தகத்தை தொடங்கியது.

இந்தநிலையில் பிளிப்கார்ட் நிறுவன குழுமத்தின் தலைமை செயல் அதிகாரி கல்யாண் கிருஷ்ணமூர்த்தி கூறுகையில் ‘‘உணவு பொருட்கள் விற்பனையில் கவனம் செலுத்தவதற்காகவே ‘பிளிப்கார்ட் பார்மர்மார்ட்’ என்ற பெயரில் புதிய நிறுவனத்தை தொடங்கியுள்ளோம்.

இந்த நிறுவனம் முழுக்க முழுக்க உணவு பொருட்கள் விற்பனையில் கவனம் செலுத்தும். இதன் மூலம் இந்திய விவசாயம் மற்றும் உணவுபதப்படுத்தும் துறையும் ஊக்கம் பெறும். இதற்கான அனுமதியை பெற்றுள்ளோம். அதேசமயம், விற்பனை மற்றும் கொள்முதல் தொடர்பாகவும் ஆலோசனை நடத்தி வருகிறோம்.

பெரிய அளவில் விற்பனை சங்கிலியை உருவாக்கவும் முடிவு செய்துள்ளோம்’’ எனக் கூறினார்.

பிளிப்கார்ட் நிறுவனத்தில் அமெரிக்காவின் வால்மார்ட் நிறுவனம் ஏற்கெனவே முதலீடு செய்துள்ளது. அமெரிக்காவில் வால்மார்ட் நிறுவனம் பெரிய அளவில் உணவுச்சந்தையில் கோலோச்சி வருவது குறிப்பிடத்தக்கது.

இந்து தமிழ் திசை