மழை பெய்தாலும் சந்திரயான் பாயும் : சிவன்

-

-

-
திருப்பதி :
மழை பெய்தாலும் கூட, நிலவுக்கு செல்லும் விண்கலம்
சந்திரயான் -2 ஏவப்படும், வரும் திங்களன்று அதிகாலையில்,
திட்டமிட்டபடி ஏவப்படும் என்று இஸ்ரோ தலைவர் சிவன்
தெரிவித்துள்ளார்.

978 கோடி ரூபாய் :

இந்திய விண்வெளி ஆராய்ச்சி நிறுவனமான இஸ்ரோ,
சந்திரயான் - 2 என்னும் 978 கோடி ரூபாய் செலவிலான
திட்டத்தை தீட்டியுள்ளது. இதில்,ஜி.எஸ்.எல்.வி மார்க் 3 ராக்கெட்
மட்டுமே 338 கோடி ரூபாய் செலவில் உருவாக்கப்பட்டுள்ளது.

சந்திரயான் - 2 :

இது தவிர நிலாவை சுற்றி வந்து ஆராயும் சந்திரயான் -2,
நிலாவில் தரையிறங்கும் விக்ரம் கலம், விக்ரம் கலத்தில்
இருந்து பிரிந்து நிலாவின் ஊர்ந்து சென்று ஆராயும் பிரக்யான்
கலன் ஆகியவை 648 கோடி ரூபாய் செலவில் உருவாக்கப்பட்டுள்ளன.

4 டன் எடை :

4 டன் எடையைக் கூட சுமந்து செல்லும் திறன் கொண்ட மார்க் 3
ராக்கெட்டில் வைத்து வரும் திங்களன்று (ஜூலை 15) அதிகாலை
2.51 மணிக்கு ஆந்திர மாநிலம் ஸ்ரீஹரிகோட்டாவில் இருந்து
சந்திரயான்-2 விண்கலம் விண்ணில் ஏவப்படுகிறது. விண்ணில்
ஏவப்பட்ட பின்னர் பூமியை 5 முறை ராக்கெட் சுற்றி வரும்.

இந்த பயணத்தின் போது, அதன் 6 பாகங்களும் ஒன்றன் பின்
ஒன்றாக கழன்று கொள்ள இறுதியாக உள்ள முனைபகுதியில்
அமர்ந்திருக்கும் சந்திரயான் - 2 விண்கலம் நிலாவை நோக்கிய
தனது பயணத்தை தொடங்கும்.

நிலவில் சந்திரயான் :

பூமியின் இருந்து 3,84,000 கிலோ மீட்டர் தூரத்தில் உள்ள நிலாவை
அடுத்த இரு மாதங்களில் அதாவது செப்டம்பர் மாதம் 6 அல்லது
7 ஆம் தேதி சந்திரயான் அடைய உள்ளது.

ககன்யான் திட்டமும்...

இதனிடையே, திருமலை, திருப்பதியில் சாமி தரிசனம் செய்த
இஸ்ரோ தலைவர் சிவன், அங்கு செய்தியாளர்களிடம் பேசினார்.
அப்போது அவர் கூறுகையில், '' மழை பெய்தாலும் சந்திரயான் -2
திட்டமிட்டபடி விண்ணில் திங்களன்று அதிகாலை ஏவப்படும்.

நிலவுக்கு மனிதனை அனுப்பும் ககன்யான் திட்டமும் விரைவில்
செயல்பாட்டுக்கு வரும்,'' என்றார்.
-
-----------------------------
தினமலர்