எவரெஸ்ட் சிகரத்தில் குப்பை கிடங்கு இரு வாரங்களில் 3,000 கிலோ அகற்றம்

-
கடந்த, 14ம் தேதி, நேபாள புத்தாண்டு தினத்தில்,
எவரெஸ்ட் சிகரத்தை துாய்மையாக்கும் பணி துவங்கியது.
முதன் முதலாக, டென்சிங் மற்றும் ஹிலாரி, 1953, மே, 29ல்,
எவரெஸ்ட் சிகரத்தை தொட்டனர்.

அதன் நினைவாக, எவரெஸ்ட் துாய்மை திட்டம்,
மே, 29 வரை நடைபெற உள்ளது. இப்பணியில், பல்வேறு அரசு
மற்றும் தொண்டு நிறுவனங்கள் பங்கேற்றுள்ளன.

இது குறித்து, நேபாள சுற்றுலா துறை தலைமை இயக்குனர்,
தண்டு ராஜ் கிமிரி கூறியதாவது:

எவரெஸ்ட் சிகரம், குப்பையின் சிகரமாக மாறி வருகிறது.
மலையேறுவோர் விட்டுச் செல்லும் காலி ஆக்சிஜன் சிலிண்டர்,
சமையல் பொருட்கள், பீர் பாட்டில்கள், மனித கழிவுகளால்,
உலகின் மிகப் பெரிய குப்பை கிடங்காக எவரெஸ்ட் மாறியுள்ளது.

எனவே, முதன் முதலாக, 2.30 கோடி நேபாள ரூபாய் செலவில்,
துாய்மை திட்டத்தை துவக்கியுள்ளோம்.

மலையின் அடிவாரத்தில், குழு துாய்மைப் பணியில் ஈடுபட்டு
வருகிறது. இதுவரை, 3,000 கிலோ குப்பையை, ராணுவ
ஹெலிகாப்டர்கள் மூலம் சேகரித்துள்ளோம்.

இறந்து கிடந்த, நான்கு பேரின் உடல்கள் மீட்கப்பட்டுள்ளன.
மேலும் உடல்கள் கிடைத்தால், கொண்டு வரப்படும்.

இந்தாண்டு, வெளிநாடுகளைச் சேர்ந்த, குறைந்தபட்சம்
500 பேரும், 1,000த்திற்கும் அதிகமான, மலையேற உதவுவோரும்,
சிகரம் செல்வர் என, எதிர்பார்க்கப்படுகிறது.

அவர்கள், எவரெஸ்ட் சிகரத்தின் மேல் முகாம்களுடன், உலகின்
நான்காவது உயரமான சிகரமான, லேட்சிக்கும் செல்ல உள்ளனர்.
அவர்களும் திரும்ப வரும்போது, முடிந்தவரை குப்பையை
கொண்டு வருவர்.

மலை ஏறும் ஒவ்வொருவரும், குறைந்தபட்சம், 8 கிலோ குப்பையை
எடுத்து வர வேண்டும் என, 2014ல், நேபாள அரசு உத்தரவிட்டுள்ளது.
இவ்வாறு அவர் கூறினார்.
-
------------------------------------------
தினமலர்