நரகாசுரவதம்

நரகாசுரவதம்


அன்னை சத்யபாமா - தன்
அன்புப் புதல்வன் நரகனை
அழித்தது தீபஒளியாம்.

இருளகன்று ஒளி பிறந்ததாம்
இறைஞ்சி கேளுங்கள்
எங்கள் பாரத பூமியில்
எத்தனை நரகர்கள்
எண்ணில்லா - நம்தாயின்

செல்வத்தில் கல்வியைச் செழித்து
செல்வத்திற்காக அந்நியன் காலடியில்
மணிக்கொடியை பறக்கவிட்டு
தொப்புள் கொடியை அறுத்து பறக்கும்
பல்வேறு கொடியை ஏந்தி
பச்சோந்தி வேடந்தரித்து

சட்டத்தைக் கற்றோம்
சகாப்தங்களை மாற்றினோம்
சககுற்றவாளியை காப்பாற்ற

காந்தி பிறந்த பூமி
காலமெல்லாம் கூவிக்கூவி
காய்ச்சிய மதுவும் ஹிம்சையும் தினமும்
காலை முதல் கொண்டு ஆடுவோம்.

ஒருவனுக்கு ஒருத்தி திருமணமா!
ஒருகும்பிடு அந்நிய கலாச்சாரத்தின்
ஒருதுளி நான்.

தினம் ஒருத்தி மணம் நிறுத்தி
தியாகிகள் பெயரில் தீவினை(ள)யாட்டு
சங்கம் வளர்த்த பாண்டியர்கள்
சங்கம் வைத்துள்ளனர் ‘பேட் பாய்ஸ்” என்று

சிங்கத் தமிழினமே தூங்காதே - நான்
சிங்காரித்து உனை மொட்டையடிக்க
சிரிக்காமல் உனை சிந்திக்க விடாமல்
சிலிர்க்கும்படி பல ஆண்டாய் நடித்து வருகிறேன்.

கண்ணகி போல் வாழாதே!
கண்ணடித்து வாழக் கற்றுக்கொள்
கட்சியும் நடத்தலாம் ஆசிரமத்தையும் ஆளலாம்.

இராவணன் பெயரைச் சொல்லாதீர்
இராவாக ஒரு பெண்ணை அடையாமல்
இராகம் பாடித் திரிந்தவன்

எங்களைப் பாருங்கள்
எள்ளென சொல்வதற்குள்
அலைபேசியில் அடைத்த
ஆச்சாரமான சீதைகள்

எதிலும் எனக்கு எவ்வளவு?
எதற்கும் என்னிடம் வா.
எங்கே போனாலும் பூமி உருண்டை
என்னை விட்டபின் தெரியும்

கையில் லட்சம் காட்டியவுடன்
கையில் பரிமாற்றம் பணி ஆணை
கையூட்டு என்று சொல்லாதீர்கள்
கையை விடுத்து பெரும் பையில்
கைபடாமல் வாங்குகிறோம்.

மன்னியுங்கள் நாங்கள்
மாதாவையே பங்கு போடும்
மாதவசிகள் - எங்களுக்கு
பிரிவினையும் தெரியும்
பிரியாத சுவீசினையும் தெரியும்
நாங்கள் 80புக்காக
நன்மை செய்கிறோம்
என்று தவறாக நினையாதீர்
எங்களின் படக் காட்சியைத்தான்
என்றும் காட்டுகிறோம்.

நாங்கள் நடிகரல்லவா
நாயகருக்காக நாய் போல் இருப்போம்
இதுவரை ரொட்டித்துண்டுமில்லை
எலும்புத்துண்டுமில்லை
எங்கள்துண்டு தான் பறக்கிறது.

நள்ளிரவில் என்ன?
பகலில் ஒரு பெண்ணை
நடக்கச் சொல்லுங்கள்
தெரியும் - நாங்கள்
திருடர்களா காமுகர்களா என்று

எப்படி பாரதபாமாவின்
எண்ணில்லா தவப்புதல்வர்கள்
கிருஷ்ணன் விழித்து விட்டான்
தண்டிக்க வேண்டிய பாமா
தூங்குகிறாள்.

எத்தனை தீபச்சுடர்கள்
எத்தனை கருணை நோக்குடன்
எரிந்துள்ளன - அவைகளை மறந்து
எவைஎவையோ பகுத்தறிவு என மயங்கி
ஏட்டையும் மறந்து எட்டை (அட்டமா)யும் மறந்து

ஏனோ! ஏனமா? இல்லை மோனமா?
தெரியாமல் வாழும் நீவிர்
திருந்தி தமிழினம் காக்க
தாய்மடி சேர்வீர் எல்லாம் விடுத்து
நன்மை தொடுத்து
மானுடம் வெல்ல - இல்லை
மறுபடி நரகாசுரவதம்
மண்ணில் எழுதப்படும்.



       ப.வீரக்குமார்
       திருநின்றவூர்.

கவிதை அருமை

உங்களை பற்றி அறிமுகம் தாருங்கள்

வீரக்குமார்

http://www.eegarai.net/f1-forum

நன்றி ஐயா