பொன்னான நேரம் வந்தாச்சு!

**krishnaamma** · **krishnaamma** Tue Jan 02, 2018 11:01 pm

சிவன், பெருமாள், முருகன், அம்பிகை என, பல தெய்வங்களுக்கு கோவில் உண்டு. ஆனால், 'காலத்திற்கு' (நேரம்) கோவில் இருப்பதை அறிவீர்களா? மதுரை அருகிலுள்ள சிலார்பட்டி என்ற கிராமத்தில் தான், அந்தக் கோவில் உள்ளது.

இரவில் மட்டுமே திறந்திருக்கும் இக்கோவிலில், அருள்புரிகிறார், காலதேவி.
தெய்வத்திடம் நாம் எத்தனை தான் வேண்டுதல் வைத்தாலும், நல்ல நேரம் வந்தால் தான், அதைப் பெற முடியும். அந்த நல்ல நேரத்தை அருள்பவளாக விளங்குகிறாள், காலதேவி.

பஞ்சபூதங்கள், நவக்கிரகங்கள், 27 நட்சத்திரங்கள், முப்பத்து முக்கோடி தேவர்கள் என அனைத்தும், இவளின் ஆற்றலுக்கும், அதிகாரத்திற்கும் கட்டுப்பட்டவை. காலச்சக்கரத்தை இயக்கும் தலைவி இவள். இவளின் கடைக்கண் பார்வை பெற்று விட்டால், கெட்ட நேரமும், நல்ல நேரமாக மாறும். நேரத்தை மாற்றும் கோவில் என்பதால், இது, நேரக்கோவில் என்று அழைக்கப் படுகிறது.

இங்கு, கோவில் விமானம் மட்டுல்ல, கருவறையும் எண்கோண வடிவில் உள்ளது. காலச்சக்கரத்தை குறிக்கும் விதத்தில், வட்ட வளையங்களின் நடுவில், நட்சத்திர நாயகியாக அபய, வரஹஸ்த முத்திரையுடன் அமர்ந்த கோலத்தில் காட்சி தருகிறாள், காலதேவி.

அமாவாசை, பவுர்ணமி நாளில் யாகத்துடன் சிறப்பு பூஜையும், மாசி பவுர்ணமி நாளில் வருஷாபிஷேகமும் நடைபெறும். சூரியன் மறைந்ததும், நடை திறந்து, மறுநாள், சூரிய உதயத்தின் போது சாத்தப்படும்.

இக்கோவிலை வலமிருந்து இடமாக, 11 முறையும், இடமிருந்து வலமாக, 11 முறையும் சுற்றி வந்து வணங்கிய பின், சன்னிதி முன் இருக்கும் காலச்சக்கரத்தின் மீது அமர்ந்து தியானம் செய்ய வேண்டும். பின், அம்பாளுக்கு விளக்கேற்றி வழிபட்டால், துன்பம் நீங்குவதோடு நல்ல நேரமும் வந்து சேரும்.

மதுரை - தென்காசி சாலையில், 45 கி.மீ., துாரத்தில் உள்ளது,
எம்.சுப்புலாபுரம். அங்கிருந்து சிறிது துாரம் நடந்தால், சிலார்பட்டி வந்து விடும்.
எம்.சுப்புலாபுரத்தில் கோவில் இருக்குமிடத்தைக் காட்டும் கைகாட்டி உள்ளது.

தி.செல்லப்பா

பொன்னான நேரம் வந்தாச்சு!

பொன்னான நேரம் வந்தாச்சு!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக