அனைத்து சுங்கச்சாவடிகளிலும் டிசம்பர் முதல் பாஸ்ட் டேக் முறை அமல் : வரிசையில் காத்திருப்புக்குக்கு ‘குட்பை’

புதுடெல்லி: டிசம்பர் மாதம் முதல் பாஸ்ட் டேக் முறையை அனைத்து சுங்கச்சாவடிகளிலும் பயன்படுத்த மத்திய அரசு முடிவு செய்துள்ளது. இதற்கேற்ப, டிசம்பர் 1ம் தேதி முதல் விற்பனை செய்யப்படும் புதிய வாகனங்கள் அனைத்திலும் பாஸ்ட் டேக் கட்டாயமாக பொருத்தப்பட்டிருக்கும். சுங்கச்சாவடிகளில் நீண்ட வரிசையில் வாகனங்கள் காத்திருப்பதை தவிர்க்க பாஸ்ட் டேக் முறை சோதனை முறையில் அறிமுகம் செய்யப்பட்டது. இந்நிலையில், புதிதாக தயாரிக்கப்படும் கார், டிரக், பஸ்கள் அனைத்திலும் பாஸ்ட் டேக் பொருத்துவது டிசம்பர் 1ம் தேதி முதல் கட்டாயமாகிறது.

இதுபோல் நாடு முழுவதும் சுங்கச்சாவடிகளில் பாஸ்ட் டேக் முறையை டிசம்பர் முதல் அமல்படுத்த மத்திய அரசு முடிவு செய்துள்ளது. இதுகுறித்து மத்திய சாலை போக்குவரத்து துறை அமைச்சர் நிதின் கட்கரி கூறியதாவது: டிசம்பர் 1ம் தேதி முதல் அனைத்து வாகனங்களுக்கும் பாஸ்ட் டேக் கட்டாயம். இது தேசிய நெடுஞ்சாலைகளில் டிஜிட்டல் முறையில் கட்டணம் வசூலிப்பதை எளிதாக்கும். தற்போது 7.5 லட்சம் வாகனங்களில் பாஸ்ட் டேக் பொருத்தப்பட்டுள்ளது. இவை அடுத்த ஆண்டு மார்ச் மாதத்தில் 25 லட்சம் வாகனங்களாக உயரும் என எதிர்பார்க்கப்படுகிறது. தேசிய நெடுஞ்சாலைகளில் 3,500 சுங்கச்சாவடி பூத்கள் இன்னும் 2 மாதங்களில் பாஸ்ட் டேக் வசதி கொண்டதாக மாற்றப்படும். பாஸ்ட் டேக் முறையில் நாள் ஒன்றுக்கு ரூ.10 கோடி வருவாய் வருகிறது. இது அடுத்த ஆண்டு மார்ச்சில் 30 சதவீதமாக உயரும் என எதிர்பார்க்கலாம்.

இதுபோல் ஜிஎஸ்டியும் போக்குவரத்து நிறுவனங்களுக்கு பல வகையிலும் உதவுகிறது. சோதனை சாவடிகள் இல்லாததால் டிரக்குகளின் பயண நேரம் சுமார் 20 சதவீதம் குறைந்துள்ளது. ஒரு டிரக்குக்கு ஆண்டுக்கு ரூ.1.5 லட்சம் எரிபொருள் செலவு மிச்சமாகிறது. இதுபோல் பார்சல் சேவை கட்டணங்களும் 10 முதல் 12 சதவீதம் குறைந்துள்ளன. மேலும், பெரிய நகரங்களுக்குள் டிரக்குகள் வராமல் இருக்க பல்வேறு நடவடிக்கைகள் எடுக்கப்பட்டு வருகின்றன. அகமதாபாத் வாசை பகுதியில் பெரிய கன்டெய்னர் யார்டு அமைக்கவும் திட்டம் உள்ளது. இங்கிருந்து ஜவஹர்லால் நேரு துறைமுகத்துக்கு படகுகள் மூலம் கன்டெய்னர் கொண்டு செல்லப்படும். இதனால் மும்பை சாலைகளை டிரக்குகள் பயன்படுத்த தேவையில்லை. சாலை போக்குவரத்தை குறைக்க நாசிக் அருகே மன்மத் மற்றும் மத்திய பிரதேசம் இந்தோர் இடையே புதிய ரயில் பாதை அமைக்கப்பட உள்ளது என்றார்.
நன்றி
தினகரன்