தக்காளியும் வெங்காயமும் !

விவசாயத்தை காப்பாற்ற வேண்டும் என்று எல்லோரும் பொங்குகிறார்கள். வருடத்திற்கு ஒரு முறையோ , இரு முறையோ வெங்காயம் , தக்காளி கிலோ நூறு ரூபாயைத் தாண்டுகிறது. அதைக்கூட நம்மால் தாங்கிக்கொள்ள முடியவில்லை. வருடம் முழுவதும் விவசாயிகள் இழப்பை மட்டும் சந்திக்க வேண்டுமா ? இந்த விலையேற்றம் கொடுக்கும் நம்பிக்கை தான் விவசாயிகளைத் தொடர்ந்து உழைக்கத் தூண்டுகிறது.

ஒவ்வொரு முறையும் இந்த விசயம் பெரிதாக்கப்படுகிறது. கமிசன் போக விவசாயிகளுக்கு என்ன கிடைத்துவிடும். அப்படியே விலை கிடைத்தாலும் இதுவரையிலான இழப்புகளை சரிசெய்யவா போகிறது. நிச்சயம் இல்லை. அப்படியிருக்கையில் ஏன் இந்த கூப்பாடு ? கிலோ 5,10 விற்கும் போது எந்த சத்தமும் கேட்பதில்லை. அப்படி விற்கையில் செடியிலிருந்து பறித்த கூலி கூட கட்டுமா ? என்று யாரும் யோசிப்பதில்லை. இதே புலம்பலை டிவியில் காட்டும் பொருட்கள் விலையேறும் போது யாரும் கேட்பதில்லை. எந்த சத்தமும் இல்லாமல் வாங்கி வருகிறோம்.

கடந்த இரண்டு ஆண்டுகளில் GST வரிக்கு முன்பாகவே குளியல் சோப்களின் விலையும் , நாப்கின்களின் விலையும் முந்தைய ஆண்டுகளை விட மிக வேகமாக உயர்ந்துள்ளது. தக்காளியின் விலையாவது உற்பத்தி அதிகமாகும் போது விலை தானாகவே குறைந்துவிடும். ஆனால் மற்ற பொருட்களின் ஏறிய விலை இறங்குவதேயில்லை.

' உள்ளதைக் கொண்டு நல்லதைச் செய்வது தானே நமது பண்பாடு ' . அப்புறமென்ன?  எந்தக் காய்கறி விலை குறைவாக விற்கிறதோ அதை வாங்கிப் பயன்படுத்துங்கள். தக்காளி பயன்படுத்தும் அளவைக் குறைத்துக் கொள்ளுங்கள். விவசாய பொருட்களின் விலையேற்றத்தைக் கண்டு யாரும் பொங்க வேண்டாம். உற்பத்தி அதிகரிக்கும் போது விலை தானாகவே குறைந்துவிடும்.

தற்பொழுது 15 கிலோ தக்காளி கொண்ட ஒரு பெட்டியின் விலை 1000 ரூபாயிலிருந்து 1100 வரை விலை போகிறது. தரகு கமிசன் போக ஒரு பெட்டிக்கு 900லிருந்து 1000வரை விவசாயிக்கு கிடைக்கிறது.

இதே 15 கிலோ பெட்டி அதிக உற்பத்தி காலங்களில் 30 ரூபாய்க்கும் , 50 ரூபாய்க்கும் போகும். தக்காளி பறிக்கிற கூலி கூட கிடைக்காது. ஆனால் நாம் உண்பதற்காக இழப்பிலும் கடைக்கு கொண்டு வந்து சேர்க்கிறார்கள்.

எப்போதும் பெட்டி 1000 ரூபாய் விற்க வேண்டும் என்று விவசாயி நினைப்பதில்லை. நிலையாக எப்போதும் பெட்டி 200 ரூபாய்க்கு விற்றாலே போதும். ஆனால் இது ஒருபோதும் நடப்பதில்லை.

விவசாய பொருட்களின் விலையை சந்தை தான் தீர்மானிக்கிறது ; விவசாயி அல்ல. கழனியில் விளைந்ததை கடைக்கு கொண்டு வந்து சேர்ப்பது தான் விவசாயிகளின் பணியாக இருக்கிறது.

இந்த விலை உயர்வால் கணிசமான தொகை விவசாயிகளுக்கு சென்றடைகிறது.

#தக்காளி #விவசாயி