மாம்பழக் கதையையே பிடித்துத் தொங்கிக் கொண்டிராதே…!!

-
தீப நடராஜன் (சொன்னது)

——————————————

ரசிகமணி டி.கே.சி.-
முன்னோரது படைப்பு எனும் ஒரே காரணத்துக்காக
எந்தவொரு இலக்கியத்தையும், கவிதையையும்,
கதையையும், கருத்தையும் ரசிகமணி ஏற்றுக்
கொண்டது என்பது கிடையாது.

தமிழ்ச் சமுதாயமும் ஏற்றுக் கொள்ள வேண்டாம்
என்றே அறிவுறுத்தியும் வந்தவர் டி.கே.சி.

திருக்குறள், திருவாசகம், தேவாரம், திவ்யப் பிரபந்தம்,
ஒளவையார், பட்டினத்தார், பிள்ளைப் பெருமாள்
அய்யங்கார், இரட்டைப் புலவர்கள், நாலடியார்,
நான்மணிக்கடிகை, நந்திக் கலம்பகம், கலிங்கத்துப்பரணி,
முத்தொள்ளாயிரம், குற்றாலக் குறவஞ்சி, காவடிச்சிந்து…
இன்னும் பல கவிஞர்களின் சிறப்பான கவிகளை டி.கே.சி.
தமிழர்களுக்கு அறிமுகம் செய்துள்ளார்.

அவரது விளக்கத்தோடும், பார்வையோடும், தமிழ்க்
கவிகளை அணுகுவோர்க்கு ஏற்படும் அனுபவம், தனியான,
மேலான, சுவையான அனுபவம் ஆகும்.

தேவாரப் பாடல்கள் அனைத்தையும் மொத்தமாக டி.கே.சி
ஏற்றுக் கொள்ளவில்லை. அப்பர் சுவாமிகளது பல கவிகளை
அனுபவித்து, ரசித்துப் போற்றிய ரசிகமணி “கூற்றாயினவாறு”
என்ற முதல் பாடலை ஒதுக்கி விட்டிருப்பதைக் காண்கிறோம்.

தாங்கள் பெற்ற அருமைப் பிள்ளை சீராளனை பெற்றோர்
இருவரும் வாளால் அரிந்தனர் என்ற கருத்தை டி.கே.சி.
ஒப்புக் கொள்ளவில்லை.

அதே போன்று பக்திப் பரவசம் மிக்க அருமையான கவிகளை
அற்புதத் திருவந்தாதியில் காரைக்கால் அம்மையார்
வழங்கியுள்ளாரே, அவைகளைப் படித்து அனுபவிப்பதை விட்டு
விட்டு மாம்பழக் கதையையே பிடித்துத் தொங்கிக்
கொண்டிருக்கிறார்களே புலவர்கள் என்று ஆதங்கப்பட்டவர்
டி.கே.சி.
–
————————————————-

செங்கோட்டை ஸ்ரீராம்

தினமணி வலைப்பூ