பிரான்சில் பயணிகள் விமானம் விழுந்து நொறுங்கியது: 148 பேர் பலி?

2000க்கு பிறகு நடந்த மோசமான விமான விபத்துகள்

* 2000, ஜன.30: கென்யா ஏர்வேஸ் நிறுவன விமானம், அட்லாண்டிக் கடலில் விழுந்த விபத்தில் 169 பேர் பலி.

* 2000, ஏப்.19: பிலிப்பைன்ஸ் நாட்டில் போயிங் 737-200 ரக விமானம் விபத்துக்குள்ளாகி 131 பேர் பலி.

* 2000, ஜூலை 25: பிரான்ஸ் நாட்டில் ஏர் பிரான்ஸ் நிறுவன விமானம் விபத்துக்குள்ளானதில் 109 பேர் பலி.

* 2000, ஆக.23: பெர்சியன் வளைகுடா அருகே நடந்து விபத்தில், ஏர்பஸ் ஏ320 ரக விமானம் விபத்துக்குள்ளானதில் 152 பேர் பலி.

* 2001, ஜூலை 4: ரஷ்யாவில் டுபுலோவ் டூ 154 ரக விமானம் விபத்துக்குள்ளானதில், 145 பேர் பலி.

* 2001, நவ.12: அமெரிக்கன் ஏர்லைன்ஸ்சின் ஏர்பஸ் ஏ300, நியூயார்க் அருகே விழுந்து நொறுங்கியதில், 265 பேர் பலி.

* 2002, ஏப்.15: தென்கொரியாவில், சீன விமானம் விபத்துக்குள்ளானதில் 128 பேர் பலி.

* 2002, மே 7: சீனாவில் எம்.டி., 82 ரக விமானம் விபத்துக்குள்ளாகி 112 பேர் பலி.

* 2002, மே 25: தைவான் வான்பரப்பில், சீன ஏர்லைன்ஸ் விமானம் விபத்துக்குள்ளானதில் 225 பேர் பலி.

* 2003, ஜூலை 8: சூடானில் போயிங் 737-200 ரக விமானம் விபத்துக்குள்ளாகி 117 பேர் பலி.

* 2003, டிச.25: மேற்கு ஆப்ரிக்காவில் உள்ள பெனின் நாட்டில் போயிங் 727 ரக விமானம் விபத்துக்குள்ளானதில் 151 பேர் பலி.

* 2004, ஜன.3: பிளாஷ் ஏர்லைன்ஸ் விமானம், செங்கடலில் விழுந்த விபத்தில் 148 பேர் பலி.

* 2005, ஆக.14: கிரீஸ் நாட்டில், போயிங் 737-300 ரக விமானம் விபத்தில் 121 பேர் பலி.

* 2005, அக்.22: நைஜீரியாவில் முர்தலா முகமது சர்வதேச விமான நிலையத்தில், "டேக்ஆப்' ஆகும் போது ஏற்பட்ட விபத்தில் 117 பேர் பலி.

* 2005, டிச.10: நைஜீரியாவில் சோசோலிசோ ஏர்லைன்ஸ் விமானம் விபத்துக்குள்ளாகி 108 பேர் பலி.

* 2006, மே 3: கருங்கடலில், அர்மாவியா ஏர்பஸ் ஏ320 ரக விமானம் விபத்துக்குள்ளானதில் 113 பேர் பலி.

* 2006, ஜூலை 9: ரஷ்யாவில் எஸ்7 ஏர்லைன்ஸ் விமானம் விபத்துக்குள்ளாகி தீப்பிடித்ததில் 128 பேர் பலி.

* 2006, ஆக.22: உக்ரைன் நாட்டில், புல்கோவோ ஏவியேஷன் என்டர்பிரைஸ் விமானம் விபத்துக்குள்ளாகி 170 பேர் பலி

* 2007, மே 5: கென்ய ஏர்லைன்ஸ் விமானம், கேமரூன் நாட்டில் விபத்துக்குள்ளானதில் 114 பேர் பலி.

* 2007, ஜூலை 17: பிரேசில் நாட்டில், டி.ஏ.எம்., ஏர்லைன்ஸ் விமானம் விழுந்து நொறுங்கியதில் 199 பேர் பலி.

* 2008, ஆக.20: ஸ்பெயின் நாட்டின் பரஜஸ் விமான நிலையத்தில், "டேக்ஆப்' ஆகும் போது ஏற்பட்ட விபத்தில் 154 பேர் பலி.

* 2009, ஜூன் 1: பிரேசிலில் இருந்து பிரான்ஸ் சென்ற ஏர்பிரான்ஸ் விமானம் அட்லாண்டிக் கடலில் விழுந்ததில் 228 பேர் பலி.

* 2009, ஜூலை 15: ஈரானில் காஸ்பியன் ஏர்லைன்ஸ் விமானம் விபத்துக்குள்ளானதில் 153 பேர் பலி.

* 2010 , மே 12: லிபிய தலைநகர் திரிபோலியில் ஏர்பஸ் ஏ330யில் விபத்து ஏற்பட்டு 103 பேர் பலி.

* 2010, மே 22: ஏர் இந்தியாவின் போயிங் 737-800 ரக விமானம், மங்களூரு விமான நிலைய ஓடு பாதையை கடந்து ஓடி விபத்துக்குள்ளானதில் 158 பேர் பலி.

* 2010, ஜூலை 28: மோசமான வானிலை காரணமாக, பாகிஸ்தானின் ஏர்புளூ விமானம், இஸ்லாமாபாத்துக்கு வடகிழக்கு மலைப்பகுதியில் விபத்துக்குள்ளாகி, 152 பேர் பலி.

* 2014, மார்ச் 8: 239 பயணிகளுடன் கோலாலம்பூரிலிருந்து-பீஜிங் நோக்கி சென்ற மலேசிய விமானம் என்ன ஆனதென்றே தெரியவில்லை.

* 2014, ஜூலை 17: ஆம்ஸ்டர்டாமிலிருந்து கோலாலம்பூருக்கு சென்ற விமானம் ரஷ்ய எல்லையருகே சுட்டு வீழ்த்தப்பட்டதில் விமானத்திலிருந்த 298 பேர் பலி.

* 2014, ஜூலை 24: அல்ஜீரியாவிலிருந்து கிளம்பிய விமானம் மாலி பாலைவலைத்தின் வடக்கு பகுதியில் விபத்துக்குள்ளானதில் 118 பேர் பலி.

* 2014, டிச.28: இந்தோனேசியாவின் சுரபயா விமானநிலையத்திலிருந்து சிங்கப்பூருக்கு கிளம்பிய ஏர்ஏசியா விமானம் விபத்துக்குள்ளாகி 162 பேர் பலி.

பிரான்ஸ் விமானம் ஆல்ப்ஸ் மலையில் விழுந்து நொறுங்கியது விமான பயணிகள் 150 பேர் பலி

பிரான்ஸ் நாட்டில் ஆல்ப்ஸ் மலை பகுதியில் விமானம் விழுந்து நொறுங்கியதில் விமானத்தில் சென்ற 150 பேர் பலியானார்கள்.

150 பேருடன் புறப்பட்ட விமானம்

ஐரோப்பிய கண்டத்தின் மிகப்பெரிய விமான நிறுவனம், லுப்தான்சா.

இதன் துணை நிறுவனமான ‘ஜெர்மனி விங்ஸ்’, மலிவு கட்டண விமானங்களை இயக்கி வருகிறது. இந்த நிறுவனத்தின் ஏர் பஸ் ஏ–320 ரக விமானம் ஒன்று, ஸ்பெயின் நாட்டில் உள்ள பார்சிலோனா விமான நிலையத்தில் இருந்து ஜெர்மனியின் டசல்டார்ப் நகருக்கு உள்ளூர் நேரப்படி நேற்று காலை 10.01 மணிக்கு (இந்திய நேரப்படி நேற்று மதியம் 2.25 மணிக்கு) புறப்பட்டு சென்றது. இதில் 144 பயணிகள், 2 விமானிகள், 4 பணியாளர்கள் என 150 பேர் பயணம் செய்தனர்.

இந்த விமானம், காலை 11.49 மணிக்கு டசல்டார்ப் நகரை சென்றடைந்திருக்க வேண்டும். ஆனால் காலை 11 மணிக்கே அந்த விமானம் ரேடார் திரையில் இருந்து மறைந்தது. இதனால் பதற்றம் ஏற்பட்டது.

கூண்டோடு பலி

இந்த நிலையில், அந்த விமானம் பிரான்ஸ் நாட்டில் ஆல்ப்ஸ் மலையின் தென்பகுதியில், பார்சிலோனட் நகருக்கு அருகே விழுந்து நொறுங்கியது.

இந்த விமானத்தில் பயணம் செய்த அத்தனைபேரும் கூண்டோடு பலியாகி விட்டனர். விபத்துக்குள்ளான விமானம் 24 ஆண்டுகளாக இயங்கி வந்த விமானம் ஆகும். விமானத்தின் சிதைவுகளை பார்சிலோனட் அருகே பிரான்ஸ் ஹெலிகாப்டர்கள் கண்டறிந்ததாக தகவல்கள் கூறுகின்றன.

தலைவர்கள் வேதனை

இந்த விபத்து குறித்து பிரான்ஸ் அதிபர் பிராங்கோயிஸ் ஹாலண்டே வருத்தம் தெரிவித்துள்ளார். இதுபற்றி நேற்று அவர்கூறும்போது, ‘‘விபத்துக்குள்ளான விமானத்தில் பயணம் செய்த எல்லா பயணிகளும், பணியாளர்களும் பலியாகி விட்டனர் என அஞ்சப்படுகிறது. யாரும் பிழைத்திருக்க வாய்ப்பு இல்லை. பலியானவர்களில் ஜெர்மனி மக்கள் குறிப்பிடத்தக்க எண்ணிக்கையில் இருப்பார்கள். விபத்து நடந்துள்ள இடம், எளிதில் யாரும் போய்ச்சேரும் வசதியற்ற பகுதி ஆகும்’’ என்றார்.

ஸ்பெயின் பிரதமர் மரியானோ ரஜோய், ‘‘விபத்து குறித்த தகவல் அறிந்து அதிர்ச்சி அடைந்தேன். விசாரணையில் பிரான்ஸ் மற்றும் ஜெர்மனி அதிகாரிகளுடன் இணைந்து செயல்படுவோம்’’ என கூறினார்.

மீட்பு பணி

இதற்கிடையே விபத்து நடந்த பகுதிக்கு தரை வழியே வாகனங்கள் செல்ல முடியாது என்பதால் ஹெலிகாப்டர்கள் சென்று, மீட்பு பணியை தொடங்கி உள்ளது. அங்கு பிரான்ஸ் விசாரணை குழுவும் விரைந்துள்ளது. 

விபத்து நேர்வதற்கு முன்பாக காலை 10.47 மணிக்கு, அந்த விமானம் 5 ஆயிரம் அடி உயரத்தில் பறந்தபோது, விமானத்தில் இருந்து ஆபத்து சமிக்ஞைகள் வந்ததாகவும் தெரிய வந்துள்ளது.

கடைசி நிமிடங்களில்...

சிவில் விமான போக்குவரத்து துறையில் நிபுணத்துவம் பெற்ற ஆய்வாளர் மேரி ஸ்சியாவோ விபத்து பற்றி குறிப்பிடுகையில், ‘‘கடைசி நிமிடங்களில் 38 ஆயிரம் அடி உயரத்தில் பறந்து கொண்டிருந்த விமானம், 6 நிமிடங்களில் 24 ஆயிரம் அடிக்கு வந்துள்ளது. அதாவது, 14 ஆயிரம் அடி கீழே வந்துள்ளது. எனவே, விபத்து, திடீரென நிகழ்ந்து விடவில்லை. விமானி, விமானத்தை தன் கட்டுப்பாட்டுக்குள் கொண்டு வர முயற்சித்திருக்கிறார், விமானத்தை அவர் அவசரமாக தரை இறக்க முயற்சித்திருக்கவும் கூடும்’’ என கூறினார்.

விபத்தில் பலியானவர்கள் பற்றிய முழு விவரம் உடனடியாக தெரிய வரவில்லை. இருப்பினும் பெரும்பாலோர் ஜெர்மனி, ஸ்பெயின் மற்றும் துருக்கி நாடுகளை சேர்ந்தவர்களாக இருக்கலாம் என கூறப்படுகிறது. இந்தியர்கள் யாரும் பயணம் செய்ததாக தகவல் இல்லை.

விபத்து குறித்த தகவல்கள் அறிந்ததும் ஸ்பெயின், பிரான்ஸ், ஜெர்மனி மக்கள் சோகத்தில் ஆழ்ந்தனர்.