சர்வதேச ஹாக்கி லீக் போட்டி - 2015

சர்வதேச ஹாக்கி லீக் போட்டி; மலேசிய அணி அபார வெற்றி

மகளிருக்கான சர்வதேச ஹாக்கி லீக் 2-வது சுற்று போட்டிகள் புதுடெல்லியில் இன்று துவங்கியது. 15-ந்தேதி வரை நடைபெறும் இந்த போட்டி டெல்லியின் மேஜர் தியான்சந்த் நேஷனல் ஸ்டேடியத்தில் நடந்து வருகிறது. இந்தியாவை தவிர தாய்லாந்து, மலேசியா, ரஷ்யா, கசகஸ்தான், போலந்து, கானா மற்றும் சிங்கப்பூர் உள்ளிட்ட நாடுகளின் அணிகள் பங்கேற்றுள்ளன. போலந்து, கானா, தாய்லாந்துடன் இந்திய அணி 'ஏ' பிரிவிலும், மலேசியா, ரஷ்யா, கசகஸ்தான், சிங்கப்பூர் அணிகள் 'பி' பிரிவிலும் இடம் பெற்றுள்ளன.

முதல் நாள் போட்டியில் இன்று மலேசியா-கசகஸ்தான், ரஷ்யா-சிங்கப்பூர் அணிகள் மோதின. போலந்து-தாய்லாந்து அணிகள் விளையாடி வருகின்றன. அதற்கு அடுத்ததாக இன்று இரவு 8 மணிக்கு இந்தியா-கானா அணிகளும் மோதுகின்றன.

இன்று மதியம் 1 மணியளவில் துவங்கிய மலேசியா-கசகஸ்தான் அணிகள் மோதிய ஆட்டத்தில் கசகஸ்தானை 8-0 என்ற கோல் கணக்கில் வீழ்த்தி அபார வெற்றியை பெற்றது மலேசியா. ஆட்டத்தின் துவக்கம் முதலே விறுவிறுப்பாக விளையாடிய மலேசிய வீராங்கனைகள் எதிரணியினரை கோல் அடிக்க விடாமல் தடுப்பதில் மிகச்சிறப்பான ஆட்டத்தை வெளிப்படுத்தினர். ஆட்டத்தின் முதல் குவார்ட்டரில் கோல் அடிப்பதில் இரண்டு அணிகளும் அதிக தீவிரம் காட்டி வந்தன. 7-வது நிமிடத்தில் பெனாலிட்டி ஸ்டிரோக்கில் கேப்டன் சிதி ருஹானி எந்த தவறையும் செய்யாமல் இருந்தது மலேசியாவுக்கு 1 கோலை வழங்கியது. 10-வது நிமிடத்தில் கசகஸ்தான் வீராங்கனை செலுத்திய பந்தை லாவகமாக கோலாக மாற்றினார் நூருல் மன்சூர். இதையடுத்து, 2-0 என்ற கணக்கில் மலேசியா முன்னிலை பெற்றது.

இரண்டாவது குவார்ட்டரில் 28-வது நிமிடத்தில் பெனால்டி கார்னரை சிதி ஓத்மேன் 3-வது கோலாக மாற்றினார். 29-வது நிமிடத்தில் பாதின் மாஹ்த் சுக்ரி 4-வது கோலை அடித்தார். 2-வது குவார்ட்டரின் முடிவில் மலேசியா 4-0 என முன்னிலை பெற்றது. கசகஸ்தான் கோல் அடிப்பதில் போராடியது. 3-வது குவார்ட்டரில் 33-வது நிமிடத்தில் பசிலா சில்வஸ்டர் அடித்த பீல்டு கோலால் மலேசியாவுக்கு 5-வது கோல் கிடைத்தது. தொடர்ந்து கோல் மழை பொழிந்த மலேசியா 53-வது நிமிடத்தில் 8-வது கோலை அடித்து கசகஸ்தானை வீழ்த்தி அபார வெற்றி பெற்றது.

அபார வெற்றி பற்றி மலேசிய மகளிர் ஹாக்கி கேப்டன் சிது ருஹானி கூறுகையில், தொடக்க ஆட்டத்திலேயே நாங்கள் நன்றாக விளையாடினோம். எதிரணியினரின் பந்துகளை கோலாக மாற்ற எங்களுக்கு அதிக வாய்ப்பு கிடைத்தது. முதல் குவார்ட்டரிலேயே 3 பாயிண்டுகளை பெற எங்களது கோல் ட்ரிக்குகள் உதவி செய்தன. அதுவே எங்களை அடுத்தடுத்து கோல்களை போட நம்பிக்கை அளித்தது. இதே பெர்பாமன்ஸை அடுத்து வரும் ரஷ்யாவுக்கு எதிரான போட்டியிலும் காண்பிக்க தயாராக இருக்கிறோம்' என்றார்.

இந்த போட்டிகள் DD Sports சேனலில் எக்ஸ்கிளுசிவ்வாக நேரடி ஒளிபரப்பும் செய்யப்படுகிறது.