நேவிகேஷன் செயற்கை கோள் வெற்றிகரமாக ஏவப்பட்டது

**சிவா** · **சிவா** Tue Jul 02, 2013 1:56 am

சென்னை: நாட்டின் முதல், "நேவிகேஷன்' செயற்கைகோளுடன், பி.எஸ்.எல்.வி., சி-22 ராக்கெட் இன்று நள்ளிரவு வெற்றிகரமாக விண்ணில் செலுத்தப்பட்டது. இந்திய விண்வெளி ஆராய்ச்சி நிறுவனம்(இஸ்ரோ), தரைவழி, நீர்வழி மற்றும் வான்வழி பயணங்களுக்கு உதவும் வகையில், முதல்முறையாக, "நேவிகேஷன்' எனப்படும் வழிகாட்டி செயற்கை கோளை வடிவமைத்து உள்ளது.

புதிய செயற்கைகோளுக்கு, "ஐ.ஆர்.என்.எஸ்.எஸ்., 1 ஏ' என, பெயரிடப்பட்டு உள்ளது. ஆந்திர மாநிலம், ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தின், முதல் ஏவுதளத்திலிருந்து, இன்று இரவு, 11:41 மணிக்கு, இந்த செயற்கைகோள் விண்ணில் ஏவப்பட்டது.

இந்த செயற்கை கோள், 1,425 கிலோ எடை கொண்டது. இது, பி.எஸ்.எல்.வி., சி-22 ராக்கெட் மூலம், விண்ணில் பாய்கிறது. விண்ணில் ஏவப்பட உள்ள, "ஐ.ஆர்.என்.எஸ்.எஸ்.,-1 ஏ' செயற்கைகோளின் ஆயுட்காலம், 10 ஆண்டுகள். இதன் மூலம், இந்தியாவின், 1,500 கி.மீ., சுற்றளவில் உள்ள, கடல்வழிகள் மற்றும் எல்லைகளை துல்லியமாக கண்காணிக்க முடியும்.

இரவு நேரத்தில், ராக்கெட் விண்ணில் செலுத்துவது, இதுவே முதல் முறை.