சாம்பியன் டிராபி : பாகிஸ்தானை வீழ்த்தியது இந்தியா

பர்மிங்காம்: சாம்பியன்ஸ் டிராபி கிரிக்கெட் தொடரில், பாகிஸ்தானை இந்தியா 8 விக்கெட் வித்தியாசத்தில் வெற்றி பெற்றது.

இங்கிலாந்தில் சாம்பியன்ஸ் டிராபி தொடர் நடக்கிறது. இதன் "பி' பிரிவில் நடந்த லீக் போட்டியில் இந்தியா, பாகிஸ்தான் அணிகள் மோதின. "டாஸ்' வென்ற இந்திய கேப்டன் தோனி, "பீல்டிங்' தேர்வு செய்தார். பாகிஸ்தான் அணியில் இம்ரான் பர்கத் நீக்கப்பட்டு ஆசாத் சபிக் இடம் பெற்றார். இந்திய அணியில் மாற்றம் எதுவும் செய்யப்படவில்லை.

மந்தமான துவக்கம்:

பாகிஸ்தான் அணி, புவனேஷ்வர் குமார் "வேகத்தில்' துவக்கத்திலேயே ஆட்டம் கண்டது. இவரது, இரண்டாவது ஓவரில் "அபாய' ஜாம்ஷெத் (2) வெளியேறினார். இதன் பின் மந்தமான ஆட்டத்தை வெளிப்படுத்திய பாகிஸ்தான் அணி, 5.4 ஓவரில் ஒரு விக்கெட்டுக்கு 9 ரன்கள் எடுத்தது. இதன் பின் அதிரடிக்கு திரும்பிய இந்த ஜோடி, அடுத்த 5 பந்துகளில் நான்கு பவுண்டரி அடித்தது.

மழை தொல்லை:

இஷாந்த் சர்மாவின் ஓவரில் இருவரும் தலா ஒரு பவுண்டரி விளாசினர். 12 ஓவரில் ஒரு விக்கெட்டுக்கு 50 ரன்கள் எடுத்த போது மழை குறுக்கிட்டது. 16 நிமிட தாமதத்துக்குப் பின், போட்டி துவங்கியதும் புவனேஷ்வரின் முதல் பந்தில், முகமது ஹபீஸ் (27), தோனியின் "தீயான' கேட்ச்சில் அவுட்டானார்.

40 ஓவர்கள்:

நீண்ட நேரம் களத்தில் நின்ற கம்ரான் அக்மல் (21 ரன், 38 பந்து), அஷ்வின் "சுழலில்' சிக்கினார். 19 ஓவரில் பாகிஸ்தான் அணி 3 விக்கெட்டுக்கு 70 ரன்கள் எடுத்த போது, பலத்த மழை பெய்தது. அடுத்து 2 மணி நேரம், 37 நிமிட தாமதத்துக்குப் பின் போட்டி துவங்கியது. இம்முறை தலா 40 ஓவர்களாக மாற்றப்பட்டது.

சுழல் ஜாலம்:

பின் அஷ்வின், ரவிந்திர ஜடேஜா இருவரும் சுழற்பந்து வீச்சில் அசத்தினர். இவர்களது நெருக்கடியால் பாகிஸ்தான் வீரர்கள் ரன்கள் சேர்க்க திணறினர். கேப்டன் மிஸ்பா உல் ஹக் (22), ஜடேஜா பந்தில் போல்டானார். சுதாரித்து விளையாடிய ஆசாத் சபிக், ஜடேஜா ஓவரில் அடுத்தடுத்து இரு பவுண்டரிகள் விளாசினார். இவர் 41 ரன்கள் எடுத்தார். இரண்டு பவுண்டரி அடித்த சோயப் மாலிக்கை (17), ஜடேஜா வெளியேற்றினார். வகாப் ரியாஸ்(0), சயீத் அஜ்மல் (5) நிலைக்க வில்லை. ஜுனைடு கான் (0), முகமது இர்பான் (0) ரன் அவுட்டாகினர். பாகிஸ்தான் அணி 39.4 ஓவரில் 165 ரன்களுக்கு சுருண்டது. உமர் அமின் (27) அவுட்டாகாமல் இருந்தார். இந்திய அணி சார்பில் அஷ்வின், ஜடேஜா, புவனேஷ்வர் குமார் மற்றும் இஷாந்த் சர்மா ஆகியோர் தலா 2 விக்கெட் வீழ்த்தினர்.

இலக்கு மாற்றம்:

"டக்வொர்த்-லீவிஸ்' விதிப்படி, இந்திய அணி 40 ஓவரில் 168 ரன்கள் எடுக்க வேண்டும் என இலக்கு மாற்றப்பட்டது. இந்தியாவுக்கு ஷிகர் தவான், ரோகித் சர்மா மீண்டும் ஒருமுறை நல்ல துவக்கம் தந்தனர். முகமது இர்பான் பந்துகளை ரோகித் சர்மா, அடுத்தடுத்து பவுண்டரிக்கு அனுப்பினார். தன் பங்கிற்கு தவானும் பவுண்டரிகள் அடித்தார். 8.1 ஓவரில் விக்கெட் இழப்பின்றி, 47 ரன்கள் எடுத்த போது மழையால், போட்டி தடைபட்டது. பின் ஆட்டம் துவங்கியதும், அஜ்மல் வலையில் ரோகித் சர்மா(18) சிக்கினார். 11.3 ஓவரில் மீண்டும் மழை குறுக்கிட்டது.

102 ரன்கள் இலக்கு:

பின் மழை நின்றதும், 22 ஓவரில் 102 ரன்கள் எடுக்க வேண்டும் என இலக்கு மீண்டும் மாற்றப்பட்டது. தனது அபார ஆட்டத்தை தொடர்ந்த தவான், ரியாஸ் ஓவரில் வரிசையாக இரண்டு பவுண்டரி அடித்தார். இவர் 48 ரன்களுக்கு அவுட்டாகி அரைசதத்தை நழுவவிட்டார். தினேஷ் கார்த்திக் (11*), கோஹ்லி (22*) சேர்ந்து வெற்றியை உறுதி செய்தனர். இந்திய அணி 19.1 ஓவரில் 2 விக்கெட்டுக்கு 102 ரன்கள் எடுத்து சுலப வெற்றி பெற்றது. ஆட்ட நாயகன் விருதை புவனேஷ்வர் குமார் வென்றார்.

தினமலர்

அடிச்சு தொவச்சு கிழிக்காம சுளுவா மெஷின்ல தொவச்சா மாதிரி
இருந்ததால அவ்ளோ பரபரப்பு இல்லாம போச்சு சலவை

ஓயாம மழை பெய்ததால் விளையாட்டின் தீவிரத்தை உணரமுடியவில்லை

வாழ்த்துவோம் கிண்ணத்துக்கு ....!

வாழ்துக்கள் இந்தியா கிரிக்கெட் அணியே

அப்படியே கோப்பையயும் வென்றால் மிக்க மகிழ்ச்சி